ઇંગ્લેન્ડ ટીમની પાકિસ્તાન સામે ધાકડ બેટિંગ! એક જ દિવસમાં બનાવી દીધા આ 7 રેકોર્ડ, બેસ્ટ બોલિંગ લાઈનઅપ કેવાતી પાકિસ્તાનની બોલતી બંધ

પાકિસ્તાનના રાવલપિંડીમાં ઈંગ્લેન્ડ સામેની પ્રથમ ટેસ્ટના પહેલા જ દિવસે રનનું એવું તોફાન મચ્યું કે દુનિયા દંગ રહી ગઈ. ઈંગ્લેન્ડના બેટ્સમેનોએ ODI અને T20 જેવી બેટિંગ કરીને ટેસ્ટ ક્રિકેટમાં ધૂમ મચાવી છે. ઈંગ્લેન્ડે પ્રથમ બેટિંગ કરતા પહેલા દિવસે 75 ઓવરમાં 506 રન બનાવ્યા હતા. જેમાં ચાર બેટ્સમેનોની સદી સામેલ હતી. 112 વર્ષ જૂનો રેકોર્ડ તોડ્યો. આ તોફાની બેટિંગથી ઈંગ્લેન્ડે ટેસ્ટ મેચના પહેલા દિવસે બનાવેલો 112 વર્ષ જૂનો રેકોર્ડ તોડી નાખ્યો. 9 ડિસેમ્બર 1910ના રોજ સિડનીમાં ઓસ્ટ્રેલિયા અને દક્ષિણ આફ્રિકા વચ્ચે રમાયેલી ટેસ્ટના પ્રથમ દિવસે ઓસ્ટ્રેલિયાએ 494 રન બનાવ્યા હતા. ઈંગ્લેન્ડે 1 ડિસેમ્બર 2022ના રોજ આ રેકોર્ડ બનાવ્યો હતો. આ સાથે ઈંગ્લેન્ડે પહેલા જ દિવસે 7 રેકોર્ડ બનાવ્યા.

ઈંગ્લેન્ડે એક જ દિવસમાં આ રેકોર્ડ બનાવ્યા છે. ટેસ્ટ મેચના પ્રથમ દિવસે સૌથી વધુ રનનો રેકોર્ડ (506 રન). ટેસ્ટ ક્રિકેટ ઈતિહાસમાં શરૂઆતના દિવસે ચાર બેટ્સમેનોએ સદી ફટકારી છે, જેક ક્રોલી (122 રન), બેન ડકેટ (107 રન), ઓલી પોપ (108 રન) અને હેરી બ્રુક (101 રન). ટેસ્ટ મેચના પ્રથમ દિવસે શરૂઆતના સત્રમાં સૌથી વધુ રન (174 રન). સૌથી ઝડપી બેવડી સદીની ભાગીદારીનો રેકોર્ડ (પ્રથમ વિકેટ માટે 233 રન). ઈંગ્લેન્ડના ઓપનર દ્વારા સૌથી ઝડપી ટેસ્ટ સદી (જેક ક્રોલી 86 બોલ). ઈંગ્લેન્ડ માટે સૌથી ઝડપી ત્રીજી સદી (હેરી બ્રુક 80 રન). બે બેટ્સમેન દ્વારા પ્રથમ ટેસ્ટ સદી (બેન ડકેટ, હેરી બ્રુક)

ખરાબ પ્રકાશના કારણે ઈંગ્લેન્ડની પ્રથમ દિવસની રમત 75 ઓવરમાં 4 વિકેટના નુકસાન પર 506 રન પર સમાપ્ત થઈ ગઈ હતી, અન્યથા 90 ઓવરમાં ઈંગ્લેન્ડે શું કર્યું હોત તે અનુમાન લગાવવું મુશ્કેલ છે. પહેલા દિવસે જેક ક્રાઉલે 122, બેન ડકેટે 107, ઓલી પોપે 108 અને હેરી બ્રુકે 101 રન બનાવ્યા હતા. તે જ સમયે જો રૂટ 23 રન બનાવીને આઉટ થયો હતો. બેન સ્ટોક્સ તોફાની બેટિંગ કરતા 35 રન બનાવીને અણનમ છે. હેરી બ્રુક પણ શુક્રવારે નવા રેકોર્ડ બનાવવા મેદાનમાં ઉતરશે.

પાકિસ્તાની બોલરો પરસેવો પાડી રહ્યા છે. ઇંગ્લિશ બેટ્સમેનોની સામે પાકિસ્તાનના બોલરો પરસેવો પાડવા લાગ્યા હતા. જ્યારે હારીસ રઉફે 13 ઓવરમાં 78 રન આપીને એક વિકેટ લીધી હતી, જ્યારે નસીમ શાહે એકપણ વિકેટ લીધા વિના 96 રન આપ્યા હતા. નવા બોલર ઝાહિદ મહમૂદે 23 ઓવરમાં 160 રન લૂટી લીધા હતા. જોકે તે બે વિકેટ લેવામાં સફળ રહ્યો હતો.

મોહમ્મદ અલીએ 17 ઓવરમાં 96 રન આપીને એક વિકેટ લીધી હતી. આઘા સલમાને 5 ઓવરમાં 38 રન આપ્યા હતા. સઈદ શકીલે 2 ઓવરમાં 30 રન આપ્યા હતા. પાકિસ્તાને આ મેચમાં ચાર ખેલાડીઓએ ડેબ્યૂ કર્યું, પરંતુ તેઓ અસર છોડી શક્યા નહીં. આ માટે રાવલપિંડીની ખરાબ પિચને કારણ માનવામાં આવે છે. બીજી તરફ ઈંગ્લેન્ડ ક્રિકેટના ચાહકો તેને બેઝબોલ ઈફેક્ટ ગણાવી રહ્યા છે, જેમાં ઈંગ્લેન્ડે ટેસ્ટમાં આક્રમક ક્રિકેટ રમવાની રણનીતિ અપનાવી છે.